Skip to main content

Баба ми

Годинава излезе да е онаа преку 2-3 години коа се кречи дома па коа се ротира мебел па коа се прередува сè што ќе се најде дома, нели за да се освежи атмосферата и целиот ентериер.
И фала богу успеав да ги натерам мајка ми и брат ми да попуштат и да почнеме да фрламе некои стари работи кои зафаќаат место, никако не се користат и само пречат.
Трета недела како сме растурени дома и еве денес почна крајот.
Се намести сè кај што треба да биде, се средивме и ние малку и остана сеа само селектирањето на работите шо ќе си одат и тие шо ќе останат.

Недела. Глупа недела. Ден пред работа. Пред 5 ултра напукани денови со обврски.
И ден кога брат ми излага и останувам сам да разгледам шо ќе лета у канта шо ќе остане дома да потсеќа на минатото.

И седнувам така, кутија по кутија, сè што стоело под спалната да прочепкам, да видам.
Налетувам на една кутија со пликоа. Зелени, жолти, бели, црвени. Секакви пликоа.
Отворам во нив, и напикани по неколку честитки, онака на купче по 5-6 за да не стојат на отворено ама и да не се сите една по една спакувани.
Роденденски честитки, честитки шо сме им ги праќале на моите за годишнина, новогодишни честитки.
И меѓу тие новогодишните, една од 2003 од баба ми и дедо ми. Цел реферат испишан на честитката. И ја читам и ми доаѓа некоја неопислива топлина. Го познав ракописот на баба ми. Гледам горе десно поштенска марка. Која среќа бе. Луѓето живееа во станот до нас а честитките  ни ги праќаа по пошта за да се радуваме.
И ми текна на баба ми. Почина во 2005, пред цели 10 години. Ретко ми текнува на неа, каква жена беше и колку нè сакаше. Ретко ми текнува пошо тогаш имав само 12-13 години. Бев 7мо одделение. И одамна е тоа.
Наеднаш враќање на сите спомени со неа, на сите смеења, на сите карања, на сите направени колачи, кифли, пити, сплетени џемперчиња, калци, шалови, капи и ракавици. На нејзината среќна насмевка на моите петки од школо.
Еднаш, се сеќавам, надвор ја видел некој стара женичка, ѝ понудил рачен саат да ѝ продаде за 150 денари. Она сакала да го земе за мене. Му дала 500 денари и он избегал со парите и не ѝ вратил кусур. Ама среќна беше кога дојде дома и кога кажа. Купила саат за внучето, не биле битни парите.

И дополнително, на радио има некои македонски стари поп песни, како у моментов шо иде Лоша Девојка од Тамара. Песната од таа година се погоди да биде.

Недело, кучко, фала ти шо присеќаш на старите времиња.

Одјава.

Popular posts from this blog

Предновогдишна еуфорија

Не е еуфорија.

Комбинација од спомени од семејна топлина, од убава атмосфера, насмеани луѓе, симпатично украсени излози на продавници, накитени канделабри, дрвја, паркови, улици. Испреплетено со ладниот воздух, веењето на снег, тркалањето снежни топки за снешко, шарите на прозорите наутро. Чајот, столната ламба, книгата, тивката божиќна компилација од музика пуштена да ја надополнува атмосферата во позадина. Трепелтивата светлина од миризливата свеќа, волнените капа, шал и ракавици. Сеќавањето на многуте честитки кои ги праќавме и добивавме, избирањето на истите по тезгите на плоштад. Китење на елката, отплеткувањето на сијаличките и нивната музика, бирањето на нови лампиони и украси во поранешен Смешко на Максим Горки. Санката на полјаната до зграда, пакетчињата под елка, плишаните новогодишни мечиња. Зимскиот распуст, игрите со снег, мавањето со топки снег по автобуси, лижењето мразулци кои висат од покриви и натстрешници.
И денес, бидејќи многу од ова фали, поради обврските кои ги…

Скопје и ноќниот живот

Не знам дали е до мене (не е!) или до градот наш насушен, ама постов ќе го почнам директно со потенцирање на неговата цел - НОЌНИОТ ЖИВОТ У ГРАДОВ Е СРАЊЕ!

Ако тргнете во петок вечер да излезете, без притоа да немате некаде резервација, шансите да најдете место се нула. Скопје е веројатно првиот град во светот каде се резервираат места на шанк. Од кога по ѓаволите шанкот е нешто што се резервира?! Као, ако е празно, застануваш пиеш и си идеш, ако не е само си идеш и тоа е тоа.

Вториот агол од кој можете да го разгледате нашиот ноќен живот е изборот на локали каде може да отидете. Не знам, 10 нека се преку сила. Години уназад се истите локали само шо на година дена менуваат име и лик, две недели има поразлична музика и концепт на забави и после тоа - сè по старо.

- Беше у тоа новото на плоштад? Многу е добро, се вика 'рендомиме'.
- Не беше тоа 'претходнорендомиме'?
- Па да ама се смени газдата и внатре малку ентериерот и сеа е многу кул место.
* исти фаци, иста музика, …

Кога пријателството ќе стивне

Можеби кога знаете дека имате блиски луѓе не треба да си играте само за да ја истестирате јачината на врската која ве држи заедно. Можеби кога поврзаноста е доволно силна со некого, не треба тој некој да го ставите на hold во име на good old times и да се свртите према барање на нови пријателства. Можеби ако сте свесни за вредноста на едно вистинско пријателство ќе знаете дека слабата комуникација доведува до разнишување на стабилноста. Ако погледнете малку околу вас може и ќе станете свесни како ги оттурнувате од себе луѓето за кои сте тврделе дека ви се сè во животот.  Можеби ако научите да слушате и да прифаќате дека некогаш сте и вие криви, нема да создавате одбивност кај оние кои ви укажуваат на тоа само затоа што им значи вашето пријателство. Нормално е едниот секогаш повеќе да дава од другиот. Нормално е во различни периоди секој од вас различно да се вложи во врската. Ама не значи дека ако на некој му е навистина до вашето пријателство дека тој ќе треба да се преврти наопаку, …