Во моменти кога се потпишува петиција за подобри услови за децата со посебни потреби, кога народот почнува да размислува малку повеќе за сите групи на граѓани кои се дел од ова општество и појавува желба да помогне во подобрување на положбата во општеството на истите, се соочуваме со појава на група на поединци (во случајов политички аналитичар) кои мавтајќи со своите дипломи и титули (поради кои очекуваме дека ќе се начитани и ќе имаат тро побогат речник за употреба, а и самите богами така се поставуваат) без никакво размислување, за опишување на негативна карактеристика на поединец користат терминологија поврзана со една од состојбите на децата кои спаѓаат во онаа група за која се потпишува петицијата.
Не знам кој е Петар Арсовски, и искрено не ме ни интересира да дознаам, ама тој Петар Арсовски кога веќе се нарекува политички аналитичар, чие мислење се очекува да има некаква тежина, не смее да си дозволи дури ни во момент на афектна состојба да изјави нешто како она на сликата подолу.
Пред само неколку месеци кога Оливера Трајковска искористи слична терминологија, луѓето јавно побараа од неа да излезе и да се извини за несдооветната употреба на аутистичноста за доловување на сосема друга поента. Може се почека некој ден, или една недела, но на крај Оливера излезе и се извини.
Затоа сметам дека кој и да е, каде и да се наоѓа и што и да прави, Петар Арсовски треба да излезе, јавно (како што излегол за да ја даде изјавава) да се извини за давањето вака негативно светло на аутизмот сакајќи да опише политичка ситуација и да ја долови истата мисла на малку посоодветен начин.
Бидејќи веројатно ваквата несоодветна употреба на терминологијата кај нас е прилично честа појава, би замолил во секој момент кога можете и имате простор за тоа да укажувате на овие работи. Колку и да е навидум незначајно, патот кон општеството кон кое се стремиме се изодува чекор по чекор. И секој од тие чекори е важен.